"Нёманскi шлях" - гэта 10-кіламетровы зялёны маршрут, які пачынаецца ў в. Дакудава Лідскага раёну Гарадзенскай вобласці, вядзе да поймы ракі Нёман, выводзіць на бераг Нёмана і вяртае падарожнікаў у вёску Дакудава, утвораючы, такім чынам, круг.
Нёман - рака, якая здаўна мела для беларусаў асаблівае значэнне, гэта апеты паэтамі "Бацька Нёман". Акрамя гэтага, яна славіцца сваімі маляўнічымі пейзажамі, дзе поплава і багністыя ўчасткі чаргуюцца з іглічным і змяшаным лесам.
Прыродна-дыдактычны маршрут "Нёманскi шлях", уключаючы ў сябе цікавыя прыродныя і гістарычныя аб'екты дадзенай мясцовасці, можа быць выкарыстаны не толькі для турызму, але і для атрымання экалагічнай адукацыі і фармаванні навыкаў даследчай працы.
Вялікая перавага маршруту - магчымасць яго працягу ўздоўж ракі, а таксама да найболей цікавых месцаў рэгіёна.
